王維基性格 拍紀錄片都去到盡

香港電視主席王維基（Ricky）做人拼搏，做事去到盡，無番咁上下搏命都做唔到「魔童」嘅同事。早排Ricky派咗十幾位同事，包括藝人劉玉翠、艾威及周俊偉，聯同一班攝製團隊去咗越南中部、全球最大地洞「韓松洞」拍紀錄片《挑戰》，係首支踏入此地探險嘅香港隊伍。雖然行程得七公里，但要在黑暗嘅洞內跨越天坑、鐘乳石群、樹林、河流等崎嶇地勢，大家可以想像有幾驚險，攝製隊返嚟個個叫晒救命。

劉玉翠喊住要回家

黛安喺試映會上見到劉玉翠，佢更自爆曾經驚到蹲喺地下喊。事緣旅程搞到周身傷嘅佢行到一個天坑前面，見到個坑好闊，即使雙腳一字馬都跨唔過，當時佢望住呢個無底深潭，即時喊晒口話要返屋企。

艾威亦分享，當初Ricky叫佢去越南時，心諗：「去咪去，怕你呀？」去到先發覺之前高估自己。佢話平時啲綜藝節目飲飲食食咪幾好，使唔使咁搏呀？監製鄧婉媚事後間接答咗佢：《挑戰》正好貫徹香港電視台風格，咩都去到盡。計黛安話係貫徹Ricky嘅風格就真！

其實香港電視仲請咗60個當地嚮導，幫佢地孭住三部各重30公斤嘅發電機及成百斤電油入洞，諗下點運送物資入去都覺得頭痕，黛安由衷佩服呢班幕後功臣。

聽講六集韓松洞之旅共用咗100萬拍攝，Ricky認為唔貴。佢仲話一旦成功發牌，第一樣要做嘅就係去爬喜瑪拉雅山，仲即場撩大家參與。其實Ricky之前已經去過喜瑪拉雅山6000幾米高嘅位置，稍後再訪，唔知會否拍成另一輯《挑戰》同觀眾分享呢？

OK便利店母公司開「指點」網購平台

《挑戰》嘅精華片明晚會上載YouTube，除咗香港電視之外，OK便利店嘅母公司利亞零售，亦積極透過互聯網接觸客群，噚日佢哋嘅新網購平台「FingerShopping.com指點」正式開張，一開業已羅致60幾間商戶加盟，由電器、服飾、美容產品、潮流玩意、生活雜貨等咩都有得賣，部分貨品仲係由名設計師、社企出產，各適其適。

噚日公司喺油塘大本型舉行開幕典禮，利亞零售行政總裁楊立彬（Richard）都有出席。提到網站命名，Richard同黛安講，如今大家拎住一部平板電腦或手機，手指一篤隨時隨地買到嘢，叫「指點」就適合不過。

「指點」最大優勢係擁有OK便利店呢個強大嘅連鎖渠道支援，大家喺網站睇啱心水貨品，除咗可以將貨品寄返屋企，亦可選擇運到任何一間OK便利店，無論選擇邊一個渠道，都可在兩日內收貨。喺OK攞貨仲有一個好處，就係收到貨先畀錢，唔使驚畀咗錢無貨返。

黛安上網站睇過，設計簡約清晰，睇得非常舒適。尤喜愛「送禮正點」一欄，每逢送禮時節，諗吓送咩畀人最傷腦根，網站特登幫大家分門別類：「給爸媽」、「給孩子」、「給工作夥伴」，全部幫你諗好晒，以後唔使煩。現時登記入會，不但送50元電子現金券，選擇到OK取貨仲免收運費！