【聲明】港生活網站並無進行電話推廣活動

利園變身嘉年華 七欖鬧市開Party

發佈時間: 2017/04/03

今個周末就係一年一度嘅香港國際七人欖球賽「Hong Kong Sevens」,有得入場睇呢場體壇盛事固之然開心,無票入場都唔緊要喎!因為賽事合作夥伴滙豐銀行、國泰航空和香港欖球總會,特別喺銅鑼灣利園區直播賽事,仲打造咗一個球迷嘉年華,有得食、有得買,仲可以免費玩遊戲!

設互動攤位 玩遊戲贏入場券

近年好多大型活動都喺鬧市舉行,將繁忙嘅街道變成嘉年華會。今次活動就將銅鑼灣利園區改造成一個欖球Party,到時會見到3米高嘅巨型充氣欖球、28個國家嘅創意旗幟、14支「打氣柱」,仲有非洲鼓樂、霹靂舞、雜耍、迷你音樂會等等,就算唔係球場都完全感受到呢份熾熱嘅氣氛!

黛安認為,現場氣氛咁好,梗係影相打卡、share畀朋友先啦!現場設有「CHEERING KIOSK」互動影相攤位,有多個不同參賽隊伍嘅加油面譜和口號,只要隨機挑選一個國家,喺臉畫上球隊嘅打氣面譜,就可以影相留念。想逼真啲?可以用球隊嘅國家語言打氣,做個聲浪測試,玩完後仲送一張電子優惠劵,有機會贏得香港國際七人欖球賽嘅入場券!

嫌唔夠現場感?行去啓超道地面又有「國泰航空180°特效動感攝影區」,用香港大球場做背景,180°來個高清全景影像,真係好似去咗現場咁。

撰文: 黛安 消息特靈八卦公關
欄名: 八卦名利場