億萬太子女自認慳妹 翠如BB買樓也呻難

黃翠如及楊詩敏（蝦頭）昨日出席銀行戶外挑戰賽活動，翠如BB雖然貴為上市公司太子女，目前家族身家近百億，但翠如依舊保持慳家美德，希望能儲夠首期買樓︰「儲錢好困難，物價一路升，啲錢就一路咁貶值！」

翠如BB自言小時候已有儲蓄習慣，「我幫人補習嗰陣已開始儲錢，儲幾多位數唔好講，我一直都好慳，最叻唔使錢。不過我投資好差，錢都係儲喺戶口。」她自言有師奶心態，希望樓價下跌，能夠早日上車。「之前有人話買唐樓等收樓，我都有睇過，新樓盤又好貴，宣萱教我要不停睇樓，等自己有個目標去賺錢。」她笑言平日與男友蕭正楠鬥慳。

提到男友早前弄傷腳，她笑說︰「佢係小強，武指話佢斷韌帶，但佢無郁兩日，趷咗一排後依家好番好多。」蕭正楠早前自言不敢喝女友的愛心湯，翠如笑說︰「女人好記仇，佢死硬，不過都想佢快啲好番。」

Fit爆蝦頭曾是女飛魚

同場的蝦頭自從減肥成功後，整個人清秀不少，她自言甚愛運動，讀書時期曾在游泳比賽奪獎。「因為我係蝦，所以好熟水性，不過依家少咗游水，健身同步行較多。」她又讚男友邵子風勤力做運動，不過身形反覆，「瞓覺時望佢覺得好瘦，但佢起身又肥番。」

撰文︰李潔盈

編輯︰黃寶恩

設計︰招潤洪