【聲明】港生活網站並無進行電話推廣活動

攞《晴報》送太興奶茶 宣傳3送1優惠

發佈時間: 2017/04/06

無論係早餐定3點3下午茶,點少得叫番杯港式奶茶歎下?昨日一早出中環地鐵站,見到《晴報》派報員為大家送上報紙之餘,仲大派太興罐裝奶茶,吸引唔少讀者排隊,黛安當然都有捧場啦!

後來向《晴報》的姊妹八卦,原來昨日佢哋同太興合作,喺中環、鰂魚涌同尖沙咀三地,免費派出3,000罐奶茶畀讀者,度度都受歡迎到排長龍。現場仲見到太興罐裝奶茶買3送1優惠的banner,原來即日至4月13號,去太興分店(香港國際機場及又一城分店除外)買罐裝奶茶都可享買3送1優惠,以每罐$11計算,即係$33就有4罐,好抵啊!不過數量有限,售完即止,要買就趁手!

太興罐裝奶茶方便衞生就唔使多講,仲保留即沖的地道港式風味,十分之受歡迎,連航空公司都引入做噱頭。黛安記得2014年,太興第一次同國泰港龍航空合作,讓乘客喺3.5萬呎高空,都可以飲到港式地道奶茶。事隔3年,最近太興再次同國泰港龍聯乘合作,由即日至5月15日,只要乘坐由香港出發的部分航綫頭等、商務和經濟客艙,又可以歎到啦!

撰文: 黛安 消息特靈八卦公關
欄名: 八卦名利場