馬明心穎BB 撑枱腳歎日本菜

馬國明與黃心穎的感情發展，似足一齣連續劇，馬明遲遲不肯踏出第一步，提起戀事即刻支吾以對，反而不及心穎BB表現大方。不過，昨日他終於有料爆︰「之前放假約咗佢（心穎）出街食日本菜。」看來感情邁進一大步。

馬國明、楊明及蔡思貝等昨日出席劇集《心理追兇Mind Hunter》之「極速任務」宣傳活動，即場舉行小型高卡車比賽，可惜馬明表示通宵拍劇，開工太累怕不夠精神而放棄出賽。正忙於拍攝《宮心計2：深宮計》的他，澄清近來每日只是開兩組，時間都算正常，故沒有爭取更多休息時間。記者笑問黃心穎可有煲湯畀他飲？馬明笑言︰「無喎，反而胡定欣就有，佢屋企人攞壺湯嚟，佢分咗啲畀我飲。」

蔡思貝跣胎撞泵把

傳媒再追問馬明與心穎的感情可有進展？他竟轉口風表示︰「之前約咗一齊食日本菜。（今次又食日本菜？）我哋都鍾意食日本嘢。（咁邊個畀錢？）佢畀，因為之前有啲嘢我畀咗，朋友出街就係咁。」問到是否加深了解？他笑言發現大家都鍾意食日本菜，亦可算是有進展了。

此外，馬明大爆蔡思貝早前又撞車，她解釋︰「早前天雨路滑，架車四條車胎比較舊，所以唔小心跣一跣撞到泵把啫，依家換咗車胎就無事。」

撰文︰Pauline

編輯：陳禮恒

設計：招潤洪