合唱新歌 阿倫讚華仔暖男獻聲勁吸引

校長譚詠麟籌備了兩年的國語大碟《欣賞》將於4月20日推出，今次找來他認為十位在樂壇的靚聲一齊合唱，當中已為人父的劉德華以暖男聲綫演繹歌曲，令校長讚不絕口；但遺憾張學友最終因忙於籌備演唱會而無法寫歌，希望下次出碟可以集合更多具分量的歌手。

譚詠麟今次邀得劉德華及陳奕迅等與校長共同演繹愛情、環保、生活態度及人生哲理等題材靚歌。昨日舉行試聽會上，阿倫和大碟的監製Johnny Yim亦有出席。阿倫和劉德華合唱《簡單是福》，他大讚華仔用一把暖男聲去演繹。「真係好少聽到華仔用呢種暖男聲去唱歌，做咗爸爸真係唔同，可能佢用𠱁個女瞓覺把聲去唱。」不過，原本答應為他寫歌的張學友因分身不暇，最後決定「棄權」，幸最終學友都有和他合唱，令校長十分感激。

志偉無意寸黑仔

阿倫形容碟內每首作品就似他的仔女，全部都喜歡。稍後他還會到北京為新碟造勢，部分歌手都會出席，問他會否送一張碟給華仔？校長說︰「一定會啦，仲會連人帶碟親自送上門，值得嘅！」得悉華仔的康復進度理想，他都放心下來。下次會否邀請另外兩位天王黎明和郭富城合作？他說最重要檔期配合。

問到會否贈碟予今個月14日生日的曾志偉，校長笑言︰「會！不過佢生日當天我喺佛山，（請佢食飯慶祝？）佢都欠我好多餐，贏馬、攞獎，夾夾埋埋佢送層樓畀我就差唔多。」

談到志偉被指在金像獎台上寸「黑仔」姜皓文失獎，校長就為好友澄清︰「佢兩個好熟㗎，熟先會咁講。」記者笑問校長會否邀志偉合唱？他笑言︰「咁樂壇大翻身先得，即係包公審烏盆，唱申冤。」

採訪︰Pauline

編輯：林梓添

設計：梁政敏