新片血腥度爆燈 秋生預咗被Cut

黃秋生曾拍過不少恐怖驚慄片，《八仙飯店之人肉叉燒包》為他帶來影帝寶座，同時也令他患上抑鬱。新作《失眠》前晚在香港國際電影節首映導演版本，充滿血腥畫面，秋生形容直逼四級尺度。

黃秋生與邱禮濤導演再度攜手合作拍驚慄片《失眠》，秋生坦言稍後上映正場時，電影需要剪走某些戲分，才能以三級版本公映。秋生解釋：「我諗其他地方會有原裝版，但唔會喺香港，其實係可惜。好似日本人當咗《人肉叉燒包》、《伊波拉病毒》及《的士判官》係經典，又搞電影節、出埋電影Box Set。歐洲觀眾都好鍾意，呢個係一個文化，唔係娛樂咁簡單。」

談到秋生近日在網上分享抗抑鬱方法，他續說︰「抗抑鬱方法都係學番嚟，因為30幾歲時，攞完影帝便患上抑鬱。（當時無工開？）我成日都無嘢撈啦，習慣晒，嗰啲抗抑鬱方法的確有用，一定要同人傾偈，有信念，做運動令到自己健康。」

衛詩雅唔敢見家棟

戲中衛詩雅遭林家棟強姦，她拍攝後全身布滿瘀傷，衛詩雅坦言投入角色，看重播才發覺尺度幾大膽，她說︰「唔怪得拍完嗰場戲，女工作人員見到我都眼濕濕，男仔就唔敢望我，個氣氛好抑壓。」衛詩雅又稱該場戲令她留下陰影，一直不敢見家棟，直到最近在金像獎頒獎禮上與家棟碰面才消除陰影。

撰文︰Pauline

攝影︰林良明

編輯：陳禮恒

設計：梁政敏