博彩不要賭外圍

今個月一眾球迷真係忙，歐國杯嗰頭啱啱結束，全球引頸以待嘅倫敦奧運亦即將揭幕。到時實大把人因要每晚追睇賽事，搞到日頭帶埋對熊貓眼返工！

咁多國際體壇盛事，就造就咗好多機會畀世界各地嘅體育博彩公司，雖知道喺海外網站落注係違法嘅，但仍有唔少人因彩金高、多玩法而冒險。香港警方早前就搗破一個非法外圍集團，佢哋居然喺短短五日內，收咗五千萬元投注金額！

海外博彩網站設有中文繁體版本同粵語客戶熱綫；澳門彩票有限公司就剛獲續牌至2015年，佢哋都會搶攻香港呢個龐大市場。

雖然落注渠道眾多，但我啲朋友若間中落注玩下，都一定會去馬會。因為馬會所得盈餘會撥捐社會做慈善公益，若然輸錢，都叫間接做咗善事，而喺海外博彩網站輸咗，就只會益晒啲非法外圍集團。馬會提供規範化嘅足球同賽馬博彩娛樂成日畀人話鼓吹賭博，反觀賭外圍完全無年齡限制，但其禍害卻非常深遠！

(本欄逢周五刊登)