【聲明】港生活網站並無進行電話推廣活動

荔枝角戶外影院 免費登記睇法國戲

發佈時間: 2017/04/21

即將踏入五月,黛安覺得整個城市都開始瀰漫住一股藝術氣息,事關「法國五月」的活動正接踵而來。好似下星期三(26/4)起,沙田文化博物館將展出巴黎羅浮宮的珍品;昨日黛安又收到風,荔枝角的D2 Place亦將與法國五月合作,將天台變身成為戶外電影院,於5月6日起一連5個星期六晚上,播放5齣老少咸宜的精選法國人氣電影,包括《我在伊朗長大》、《歌聲伴我心》等等,而且仲係免費入場㗎!如果你有興趣,記住事先在網上登記(http://bit.ly/2pfzJCW),每場名額200個,每人每場只限預留2個名額,大會之後會向成功登記的人發出確認電郵。

現場唔單止會提供免費爆谷畀大家食住睇戲,仲有多個特色美食及本地小食攤檔。黛安建議你早啲入場,事關每場首50名入場的參加者,將可獲贈免費啤酒或雪糕券㗎!

撰文: 黛安 消息特靈八卦公關
欄名: 八卦名利場