被寸年紀大 千嬅嬲唔落

楊千嬅、余文樂及導演彭浩翔昨日在旺角宣傳新片《春嬌救志明》，千嬅被兩男夾攻狂寸年紀大，不過她笑說︰「動搖唔到我情商（EQ），之前導演話會陪我度過更年期，有邊個男人肯陪女人過更年期？我好感動，嬲唔落！」

千嬅昨日穿上近七吋高踭鞋現身，所以在台上小心翼翼較少郁動，即被樂仔、彭導取笑︰「你唔使郁，留畀我哋後生嘅郁！」三人在台上用玩具錘扑爆木板，預祝票房爆燈時，兩男又大講鹹濕笑話，不過千嬅訪問時表示不介意︰「拍咗八年戲，我塊面皮厚過鞋底，耳朵麻木晒。」彭導聞言笑指千嬅已習慣聽有味笑話，「我哋唔講，千嬅會唔舒服。」

挑戰華語片票房紀錄

同場的余文樂抱病現身，原來他食錯東西導致肚屙，彭導趁機笑樂仔說︰「食咁多嘢，唔通食錯後生女？」樂仔沒好氣笑說︰「隨便你！」千嬅提議眾人一同送樂仔去急症室，他即反擊說︰「送殯咩？」提到對新片票房有何期望，彭導說︰「電影第一集收700萬，第二集有3,000萬，係第一集嘅四倍幾，希望新片票房係第二集嘅四倍，挑戰華語片票房紀錄。」

採訪︰李潔盈

編輯︰林梓添

設計︰招潤洪