無綫劇集《全職沒女》邀得松松姐姐（陳松伶）回歸，與張兆輝刷出新火花。同時，陳瀅（Jeannie）和張振朗兩位新生代演員，在劇中飾演一對歡喜冤家，表現同樣受注目。Jeannie笑稱︰「我倆關係同套劇真係好似，只不過現實係我唔妥佢。」
張振朗在劇中飾演酒店太子爺，遇上陳瀅所演的繆思，經常認為她是「狐狸精」，慣用美色勾引其他男人。「一開頭我好唔妥繆思，但又會對佢有性幻想，後來慢慢解開誤會就開始發展出感情綫。」
女神派檸檬
兩人接受訪問時互相打鬧，笑聲連連，一點都不像曾經有過「牙齒印」。Jeannie解釋︰「原本我哋好唔熟，直頭似不和咁。我仲記得第一次同監製傾，佢話我知拍檔係張振朗，我都唔知邊個，問係咪演過《愛．回家》？當時我仲以為係何君誠。」張振朗更自爆慘食檸檬的經歷︰「有次打算同佢食lunch，傾下偈會快啲熟絡，但佢話約咗人，點知去到canteen畀我見到佢自己食飯。跟住我坐埋去嘗試傾下偈，但最後佢講唔夠兩三句就話走。」
劇中演情侶，現實關係卻如此生疏，拍攝中途兩人都覺得有必要打破尷尬，在外景接廠景的辛苦過程中，兩人開始互相支持，自然地訴說拍攝時的苦與樂，從而打開了話匣子。
性格男仔頭
拍劇後期，他們逐漸認識到真實的對方，建立起良好的默契和友誼，張振朗更對Jeannie有讚無彈，「未接觸之前，覺得佢係距離好遠嘅女神，但工作過後，發覺佢有男仔頭一面，對人好細心，原來都幾貼地。」
不過，Jeannie就抱怨劇中只跟振朗有對手戲，沒機會向松松姐姐和輝哥學習，他即對此取笑一番︰「有你就有我，但有我就未必有你。」振朗亦不忘感激兩位前輩的教導，「在輝哥身上感覺到咩叫男人，我仲係一個男仔，仲要好多經歷令我更成長。」《全職沒女》收視和口碑俱佳，證明這對歡喜冤家產生的化學作用深受觀眾喜愛，對兩位演員亦是一大鼓舞。
感情態度兩極
「宅男女神」Jeannie最近與方力申傳出緋聞，但她強調自己仍是單身，在感情上亦是一個理性的人，不會追求一時感覺。「成長過程中見到身邊嘅長輩同朋友，感情都唔係特別好，我唔相信有一生一世，即使結咗婚都可以離婚啦。其實女仔有自己思想同事業先係最緊要，事業係你實際擁有嘅嘢，永遠都係自己keep；反而喺愛情上，你好難確保有永恒。」
身旁的張振朗，感情態度卻恰好相反︰「我係感覺行先，譬如搵女朋友唔係講條件，唔一定個樣靚、身材好，而係要有種『係你喇』就不顧一切嘅感覺。」不知女友陳芷尤聽到這番說話會否冧爆呢？
陳瀅
Outfit︰MARYLING
Make up︰Vinci Tsang
Hair︰Larry Ho@ IL Colpo
Shoes︰House of Avenues
Accessory︰ onliest
撰文︰陳子楠
攝影︰張賓尼
編輯︰陳禮恒
設計︰梁政敏