黛安
黛安

$20入場 明日沙田睇羅浮宮珍品

發佈時間: 2017/04/25

$20入場 明日沙田睇羅浮宮珍品

想一睹世界最大博物館巴黎羅浮宮嘅珍品?依家有機會喇!適逢法國五月藝術節踏入25周年,同香港回歸20周年,法國五月同康文署聽日起至7月24號,合辦「羅浮宮的創想-從皇宮到博物館的八百年」展覽,想知道有咩精采內容?黛安就搜集咗最新資料同大家分享!

為期3個月嘅展覽,將會喺沙田嘅香港文化博物館舉行,場內設6個展區細述羅浮宮發展史,亦會展出126件羅浮宮皇家收藏,由雕塑、古董到著名大師級畫作都有,包括首次在羅浮宮以外展出、來自希臘、伊特魯里亞、羅馬文物部嘅馬首,仲有古羅馬皇帝裝束嘅路易十四騎馬像、寶石浮雕奧古斯都像等,統統都係羅浮宮唔同時期嘅藝術瑰寶,絕對值得欣賞!

想了解更多世界珍品,記得參加公眾導賞團,或者一系列嘅免費講座。主辨單位今次好細心,為3至10歲小朋友安排咗免費兒童繪畫工作坊,喺5月28號、6月4同25號舉行以羅浮宮內嘅畫作《蒙娜麗莎》為藍本嘅工作坊,畀小朋友以自己獨家創新嘅風格,創作出不一樣嘅《蒙娜麗莎》,家長都可以一齊參加,名額有限,報名詳情留意博物館網頁喇!

撰文: 黛安 消息特靈八卦公關
欄名: 八卦名利場