世界年輕廚師大賽 指定食材 發揮創意

如果你係16歲以上、鍾意煮嘢食，又讀緊相關課程，咁就啱喇！首屆「世界年輕廚師」榮銜分分鐘由你拎走！由《環球Gourmet》雜誌主辦，滙聚全球年輕精英廚師嘅第一屆「環球廚神．世界菁英賽2017」將喺7月5號舉行，比賽唔分菜系、地域、性別，來自俄羅斯、日本、芬蘭、台灣等地嘅年輕廚師會一較高下㗎！

參加者背景猛

環球廚神國際專業協會創會主席陳植漢（Louis）話，比賽設專業組同學生組，前者包括個人賽同由2人組成嘅隊制賽，只要係18至38歲嘅現職廚師，最少有3年工作經驗就可以報名。「如果你係16歲以上，讀緊酒店、餐飲、烹飪課程嘅全日制學生，又好有信心煮得色香味俱全嘅撚手小菜，就可參加學生組」。佢透露比賽名額只有90個，現已有30人舉手，包括32歲俄羅斯酒店總廚、18歲曾贏得歐洲廚師金獎嘅挪威後生仔等。

Louis靜雞雞話畀黛安知，今次比賽會以「指定食材」做主題，包括豬架、清湯鮑魚、忌廉芝士、天使蝦等，專業組參賽者可選擇其中1款食材；學生組則由大會提供1款指定食材，「佢哋要喺40分鐘內完成1道菜，烹飪方式由廚師自由發揮」。最能使出渾身解數真本領嘅各組別1位，就可拎到「世界年輕廚師」總冠軍嘅寶座及價值超過$1,600嘅「環球廚神‧龍騰金盃」，都咪話唔巴閉呀！