黛安
黛安

心光視障生獻唱 apm開騷籌款

發佈時間: 2017/04/26

心光視障生獻唱 apm開騷籌款

前特首選舉候選人曾俊華早前將選舉經費嘅516萬盈餘,平均捐畀10個機構,心光盲人院暨學校就係其中一個喇!黛安知道心光為展示共融和諧,5月3號下晝2點45分喺觀塘apm商場,舉辦由心光學生、校友、健視朋友等音樂愛好者帶領嘅嘉年華,希望透過音樂聯繫每個心靈,建造出和諧、平等嘅社會,真係好有教育意義,黛安都要同朋友身體力行支持!

聽講心光今次特別邀請嚟自南非嘅視障歌手Vernon Barnard來港,熱愛運動嘅佢將會透過歌聲,同大家分享過去24年患有視障嘅心路歷程,好期待當日嘅表演呀!提提大家,適逢心光踏入120周年,今個禮拜五、六將舉行視障教育國際研究論壇、《藝術無疆界─心光民生相輝映》才藝大滙演,活動除咗籌募經費,最重要係提高大家對視障人士嘅關注,一齊建立互愛共融嘅社區。關注社會大小事嘅你,點可以錯過?

撰文: 黛安 消息特靈八卦公關
欄名: 八卦名利場