長江集團慶回歸 樂隊巡迴Jam歌

喺中環返工嘅朋友，上星期五有無聽到啲喜慶旋律呢？事關長江集團當日就喺長江集團中心舉辦咗場Jam Party，以爵士樂及五重奏方式，演奏大家都好熟悉嘅歌曲，包括《Monica》、《每天愛你多一些》、《我的驕傲》、《紅日》、《喜氣洋洋》等，吸引咗大批上班一族圍觀，黛安咁啱經過，都忍唔住停低聽埋一份。

聽長江嘅PR姊妹講，原來長江集團為慶祝特區成立20周年，所以特別舉辦咗呢個《20 x 20 Jam Party》，之前已經畀市民票選咗20首最喜愛歌曲，上星期首場Party之後，一直到7月1號都會喺全港唔同地方繼續jam歌，例如中環中心、1881 Heritage、黃埔新天地黃埔號、沙田置富第一城等。黛安仲聽講，參與Jam Party嘅樂手都係資深音樂人，例如音樂界享負盛名嘅Ted Lo帶領嘅爵士樂隊Ted Lo Quartet，獲得過香港十大青少年藝術家年獎嘅鋼琴演奏家陳雋騫等，陣容鼎盛！