袁詠儀否認做虎媽

袁詠儀（靚靚）早前與老公張智霖（Chilam）和囝囝魔童結伴到英國睇波兼旅遊。期間Chilam和魔童在食早餐時掛住在社交平台玩直播，令靚靚大為不悅，更被網民發現她「黑面」。靚靚解釋只是不想囝囝沉醉於網絡世界，同時也希望他學好中文。

袁詠儀及森美昨日應邀出席以荔園為概念的茶餐廳開幕禮，靚靚笑言本身跟老闆邱達根是好朋友，加上小時候每逢假期，爸爸都會帶她和哥哥去荔園玩，她希望政府可以支持一些仍充滿香港情懷的商家繼續發展這類場所。問到當年在荔園內可有艷遇？她笑說︰「我爸爸係警察，點會有人敢埋身呀？」問到她有沒有跟Chilam在荔園拍拖，她抵死表示︰「我哋初時係地下情，唔見得光㗎，所以多數匿喺戲院睇戲咋！」

願意改壞脾氣

提到早前舉家到英國期間，Chilam與魔童玩網上直播，靚靚被發現一直黑面，她笑言︰「依家好多人去餐廳唔係享受餐飯，永遠在用手機，我比較抗拒咁樣。」加上靚靚希望囝囝能多講中文，但Chilam竟叫兒子直播時主力講英文，令靚靚激到七孔生煙︰「真係想一嘢劈過去！其實老公應該同我同一陣綫㗎嘛，呢方面係我哋唯一嘅矛盾。」

問到靚靚可是兒子心目中的虎媽？她雖否認但自稱發現原來在兒子心目中經常會say no，她會學習去改。但她表示沒有後悔讓兒子讀國際學校，認為最重要讀得開心，思想夠正面。「我本身都有臭脾氣，說話快過個腦，很容易得罪人，所以為咗個仔，也要好好學習。」

採訪︰Pauline

編輯︰林梓添

設計︰梁政敏