歐鎧淳彈男友游水唔掂

香港女飛魚歐鎧淳、江忞懿及施幸余昨日出席「新世界維港泳」記招，去年有份參加活動的歐鎧淳，今年亦會參加。問她會否相約男友胡子彤參賽？她即取笑對方泳術差︰「佢唔識游水，我諗佢應該游唔到1,500米！」

今屆維港泳將於10月舉行，屆時比賽路綫由尖沙咀至灣仔，原來歐鎧淳早在二月已為大會試賽道︰「當時係冬天，天氣好凍又大風，但係風景好正，我游背泳，可以欣賞維港景色，望住會展游，同泳池感覺好唔同。」

愛穿比堅尼曬太陽

另外，歐鎧淳透露平日會跟男友去沙灘游水，經常穿一件頭泳衣比賽的她，自言私底下愛穿比堅尼曬太陽︰「平時着咁多一件頭，着三點式會曬得均勻啲。」會否擔心被人認出搭訕？她笑說︰「大把人身材好過我，使乜同我搭訕呢？」

撰文︰李潔盈

攝影︰林良明

編輯︰黃卉彤

設計︰Simon