哈日姊妹開店 OL至愛掃貨 主打限定日式零食

開設專賣日本零食店舖的姊妹Carrie和Jessica，引入日本最新款和限定版零食，吸引鍾意新鮮的香港人，零食種類逾300款，加上網店銷售，平日放工時分吸引OL幫襯，周末也有不少一家大細去入貨，每月生意額達15萬。

位於觀塘工廈的零食店青木町，專賣日本零食和飲品，零食店由年輕姊妹花Carrie和Jessica打理，最初開舖的原因好簡單，就是鍾意食零食，「我哋去過日本最大型的食品展參觀，有成3,800個攤位，全球和日本最主要的廠商都係嗰度，一路行一路試食，也發現有唔少香港無引進的牌子，而我哋兩個都比較『為食』，所以最尾揀咗開零食舖頭。」由於家人從事急凍食品批發生意，故店內也有引進急凍食品。

簡單定價 辦促銷作策略

坊間不少零食店，引進世界各國的零食，但這間零食店卻只賣日本零食，「我哋做過相關市場調查，發現日本零食比較受歡迎，加上曾經去過韓國睇零食，始終發覺日本零食在包裝和品質較為吸引。」現時，她們會每月引進最新款和限定版零食，務求令客人有耳目一新的感覺。

起初，兩姊妹會為每款零食製作小牌子，介紹產品出產地、廠房資料等，後來零食愈入愈多，高峰期更有逾700款零食，加上小店儲有一定的回頭客後，遂沒有製作介紹小牌子。現時店內的零食陳列在由紙箱堆砌而成的貨架上，有條不紊擺放在場內每個角落，全場有逾300款零食，場面墟冚。

親身試食 推廣罕見品牌

這間零食店按不同價錢將零食分區，劃分為12元、15元、20元、28元、32元等，購買一定件數就有優惠，「開頭我哋每件產品都有不同價錢，貼上不同Label和價錢牌，後來貨種太多，為減輕工作量，變成分區賣。」這種定價策略除了方便操作，也令客人滿載而歸。

兩姊妹口味不一，有時也會為進口零食貨種而爭執，家姐Carrie喜歡綠茶和味道較甜的零食，妹妹Jessica則喜歡香口嘢，如薯片、餅乾、百力滋，Carrie笑指，「入貨少不免有爭拗，同埋入幾多都要一齊傾。」

惟日本零食種類多，經常出限定口味，即使兩人細心挑選，也難免中伏，有的是因為味道不佳，有的是包裝不夠美觀。香港零食商大多進口大牌子零食，Jessica指部分品牌她們也未見過，慢慢愈入愈多，客人開始對這類產品有信心。

現時家姐Carrie重操故業，開設補習社，零食店則由Jessica掌舵，並開始聘請全職售貨員，逐步拓展業務。

曾開分店蝕5位數離場

青木町曾在14年初開分店，可惜選址不佳，「當時分店開咗9個月，幢大廈賣波鞋為主，較少賣食品，加上配套不太好，最後我哋提早賠錢離場，蝕了5位數字。」

現時，青木町注重實體店和網店生意，比例約7:3，網店零食以原價出售，但買滿300元可免費送貨，實體店則有折扣，各有吸引，「我哋發覺網上的威力其實幾大，喺Office或偏遠地區都會上網訂。」

撰文︰蔡璿驩

攝影︰郭紫珊、梁建騰

（原文刊於iMoney）