【聲明】港生活網站並無進行電話推廣活動

中環夏誌 試玩非主流運動 7月中免費入場

發佈時間: 2017/06/12

暑假流流長,仲未諗到去邊度消遣好?黛安收到風,嚟緊7至8月中環海濱將會舉行第2屆大型夏日活動「中環夏誌」,主辦單位Central Venue Management會分別喺兩個唔同時段推出「運動型」、「慢活風」同「眾同樂」嘅主題活動,入場仲係免費𠻹!其中喺7月14日打響頭炮嘅「運動型」,仲會提供多項非主流運動嘅免費試玩,相信一定為你帶嚟不一樣嘅夏日體驗!

3大主題活動

首屆「中環夏誌」成功吸引15萬人次入場,真係犀利!CVM董事總經理莫莉話,期望今年可超越呢個數字,仲會作出新嘗試,其中就包括喺「運動型」主題入面嘅各項非主流運動啦。負責聯絡各個體育單位嘅阿Chris話,香港好多有趣運動,只係曝光率不足導致無乜人識,佢今次就特意搵嚟棍網球、地壺球、舉重、棒球等畀市民接觸下,同場仲有教練在旁,自然玩得開心又放心啦!

而8月12至27日舉行嘅「慢活風」,就啱晒較文靜一族啦,主辦單位將提供一系列有關藝術治療同健康嘅活動,仲會同香港聖公會福利協會合作,喺活動最後3日聯合建築師、入場市民同社會服務人士,用木卡板建造一個佔地5,000米嘅「HK」字樣巨型迷宮,希望藉住活動推廣正面嘅社區精神。

同「慢活風」同期舉行嘅「眾同樂」,除市集同舞蹈滙演外,到時仁愛堂仲有23架流動中醫醫療車齊齊出動,喺現場為市民把脈義診。活動咁豐富,真係唔好錯過啦!

撰文: 黛安 消息特靈八卦公關
欄名: 八卦名利場