【聲明】港生活網站並無進行電話推廣活動

AEON明日起開倉 電器家品低至3折

發佈時間: 2017/06/13

講個小秘密大家知,黛安平時行街最鍾意買嘅唔係靚衫同鞋,而係家居同廚具用品。所以一聽到AEON聽日起做開倉大特賣,唔少名牌廚具、寢室用品、電器家品都低至3折嘅時候,就知道又係時間掃貨啦!

半價掃家電廚具

為慶祝AEON開業30周年,大窩口店明日起率先舉行開倉大特賣,而荔枝角、九龍城同九龍灣分店則由後日(15號)起開倉。為咗最有效率咁掃貨,黛安梗係預先做定功課啦!4間分店入面,以荔枝角嘅特賣貨品最齊,除咗有LG電視、HP、Lenovo、Fujitsu電腦等嘅陳列品以低至6折發售,仲有Nike運動鞋同服飾都低至半價,啱晒各位潮友一齊去入貨。

聽日開倉嘅大窩口店,則會有低於半價嘅抽油煙機同洗衣機陳列品,有需要換電器嘅你必去!而另3間店都會以299蚊嘅「均一價」發售UJI多款卡通絲般綿被套裝,做咗媽媽嘅姊妹就最啱揀番幾套畀小朋友喇。

至於黛安至愛嘅廚具,4間分店都會以感謝價出售法國特福易潔深煎鍋同中式鑊,分別只係$99.9同$239咋;另一牌子Meyer嘅單柄有咀炒鍋亦以半價出售,真係令人期待!

撰文: 黛安 消息特靈八卦公關
欄名: 八卦名利場