8號波照搞首映 阿Sa自認貴人招風雨

颱風「苗柏」前日吹襲本港，正當8號風球高掛之際，由蔡卓妍（阿Sa）、周柏豪主演的電影《原諒他77次》仍按原定在奧海城舉行首映，阿Sa的好姊妹容祖兒更因廣告拍攝工作取消而驚喜現身。

首映雖在風球高懸下舉行，但無阻粉絲到場的決心。有多次颱風下開工經驗的柏豪表示︰「新人年代試過兩次首映同一次簽名會都打8號風球，頭先去整頭髮都係得我同化粧師，好似阻人收工咁。」阿Sa則自言貴人出門招風雨，更自爆曾在10號風球下出席品牌活動。「我打畀經理人提議缺席活動，點知經理人話劉嘉玲都去，我呢啲small potato無理由唔出席嘛。」

好姊妹打風打唔甩

另外，驚喜現身的祖兒透露原先要拍的廣告取消，故前來撑好姊妹場。「之前我同阿Sa（蔡卓妍）講我嚟唔到，後來嚟到我就即刻自己化粧，相信大家嚟支持阿Sa呢件事都係有真愛，打風都打唔甩，無理由好姊妹都唔嚟支持！」

此外，陳冠希（Edison）為女兒舉行百日宴，鍾欣潼（阿嬌）到場後透過公關表示不接受訪問，直到儀式開始才現身。阿嬌在台上分享如何為愛情保鮮：「同一間屋可以分開房，畀空間大家。（接受唔到甚麼事？）家暴。就算真係愛，摑兩把都接受唔到。」

撰文︰Pauline

編輯：林梓添

設計：梁政敏