【聲明】港生活網站並無進行電話推廣活動

誠哥投資升級版VR 月底香港有得玩!

發佈時間: 2017/06/14

依家唔少遊戲都會使用虛擬實境(VR)技術,但通常都係戴住副眼鏡、喺固定位置進行,走動空間唔多,而且無得觸摸實物,總係覺得唔夠逼真。黛安最近聽IT界朋友講起,一間名為Nomadic嘅美國公司,專門設計實物觸控式VR,將布景設計、實物道具、遊戲設計同埋VR故事敘述等元素結合,例如遊戲要求玩家打開櫃桶拎手槍,場地都會有實物配合,令遊戲逼真度更高,玩家體驗更刺激,而且裝置仲可隨時更新內容,戲院、商場、主題公園等場地都好啱用。

咁吸引嘅概念,唔單止黛安留意到,其實一向走喺創科界前端嘅長和系主席李嘉誠更早留意到!黛安噚日聽講,Nomadic剛剛籌集到600萬美金(約4,668萬港元)種子基金,融資係由誠哥旗下維港投資領投,Maveron、Presence Capital、Vulcan Capital及Verus International亦有參與,相信可以幫Nomadic擴展至全球。

黃埔免費體驗

雖然Nomadic計劃於2018年第一季先至將產品正式推出市場,但誠哥率先將呢個新玩意帶來香港。嚟緊李嘉誠基金會與3香港及Razer合作,今個月29號至下個月9號,喺黃埔新天地時尚坊舉辦「香港競XP」活動,到時亦會有Nomadic嘅升級版VR,市民可以免費試玩。

撰文: 黛安 消息特靈八卦公關
欄名: 八卦名利場