父親節顯孝心 免費帶阿爸坐摩天輪

阿爸細細個教落，男子漢大丈夫，做人要頂天立地。適逢父親節將至，有乜應景得過帶老竇去坐摩天輪體味呢種「頂天立地」嘅精神？黛安之前去香港摩天輪訂票時，先知原來父親節當日（18日）會有特別優惠，子女帶爸爸一齊坐普通車廂，老竇張飛即時免費，夠晒體貼﹗

睇番票價，其實成人門票每張都係$100，3歲以下細路仔本身都免費入場，計埋一家大細去都所費無幾又開心。加上摩天輪開朝10晚11，想影日頭定夜晚都咁方便。仲唔買定飛齊齊在維港兩岸美景中打下卡，同爸爸齊齊「高瞻遠矚」啦！