黛安
黛安

麥當勞向爸爸致敬 免費請「Angus」食安格斯漢堡

發佈時間: 2017/06/16

麥當勞向爸爸致敬 免費請「Angus」食安格斯漢堡

星期日就係父親節,各位諗好點同爸爸慶祝未呢?黛安想喺呢度召喚所有叫Angus嘅朋友,因為麥當勞會喺父親節當日,為所有叫Angus嘅爸爸或囝囝們免費送出重量級安格斯漢堡,作為分量十足嘅父親節禮物,各位Angus咪走寶呀!

公關姊妹噚日同黛安講,喺星期日父親節當日,凡係身份證嘅姓名上印有「Angus」或者「安格斯」嘅朋友,只要向麥當勞職員出示身份證,都可以免費獲得「芝味蘑菇安格斯」或者「泰脆洋蔥安格斯」一客。兩款漢堡製作前都會量度保證牛肉足130克,夠晒分量。泰脆洋蔥安格斯更加係「廚壇魔術師」楊尚友(Christian Yang)嘅破格創作,以泰國風味嘅脆洋蔥、濃香肉汁醬、香嫩煎蛋等襯托特厚安格斯牛肉,聽到黛安流晒口水。

星期日朝早11點開始就有得換,數量有限換完即止,各位Angus記得同屋企人一齊去,過個「重量級」父親節喇!

撰文: 黛安 消息特靈八卦公關
欄名: 八卦名利場