黛安
黛安

誠哥向DSE考生派$5000

發佈時間: 2017/06/19

誠哥向DSE考生派$5000

長和系主席李嘉誠旗下嘅李嘉誠基金會,舊年推動「善用錢」計劃,向2017年中學文憑試(DSE)考生無條件發放$5,000現金。除咗派錢之外,誠哥仲好有心,親筆寫卡畀同學,勉勵佢哋努力學業,認真窩心!昨日黛安收到風,誠哥今年決定加碼,除延續計劃外,2018年會將覆蓋嘅地區,由原本嘅離島、天水圍及元朗,擴展至屯門,預計共有91間學校、超過1萬名學生可參與,受惠人數大幅增加!

7成人用於學業

黛安向基金會嘅公關好友打聽過,原來之前「善用錢」計劃推出後,基金會收到好多意見,認為計劃嘅「無條件」性質突破限制,畀學生自行決定點樣使用$5,000,具有多重意義。唔少意見亦希望計劃擴展至屯門區中學,基金會從善如流,決定加碼。

究竟學生哥會點用$5,000?基金會舊年展開「善用錢」計劃後,向約5,000名申請「善用錢」計劃嘅學生做過問卷調查,有7成同學話,會將$5,000用於學業相關嘅用途,包括DSE考試費、留位費、購買練習、報讀補習班等,亦會用嚟儲蓄、幫補家計、買衫畀弟妹,更有同學仔用嚟做善事,樂己助人,喺思考點用筆錢嘅過程中,有唔少得著。

撰文: 黛安 消息特靈八卦公關
欄名: 八卦名利場