LCX貓巴士退役 換《千與千尋》場景

如果你係宮崎駿動畫《龍貓》嘅粉絲就要金睛火眼留意喇！專售宮崎駿動畫精品嘅「橡子共和國」（Donguri Republic）喺香港有2間分店，其中位於尖沙咀海港城、日本以外首間分店內，擺放咗一隻印有「香港」字樣嘅貓巴士，黛安睇fb見到佢今日要退役喇！「貓粉」們要趁今晚10點關門前去影相留念呀！

消息一出，黛安都覺得好可惜同唔捨得，即刻同公關姊妹八卦龍貓巴士去向，聽講會運返日本先，點處置就要等總公司決定；至於會唔會拍賣，益下一班「貓粉」，姊妹就話唔會喇，而銅鑼灣分店嘅龍貓巴士會繼續為大家「服務」，暫不撤離香港，大家可以放心！

送$6000旅遊禮券

究竟點解要安排龍貓巴士退役？原來聽日係海港城店開幕4周年嘅大日子，希望換換新場景，為大家帶來新鮮感，聽聞會轉做《千與千尋》場景，主角之一「無臉男」都會出場㗎！有開心事當然要慶祝啦，由聽日起購物滿指定金額，就會送限定版襟章、龍貓旅行套裝，周六（24日）開始仲可以參加埋抽獎，有機會贏走$6,000東京旅遊禮券𠻹！今次勢必掀起搶購潮，黛安都要去買呀！