PMQ下周開市集 新舊品牌crossover

「古老當時髦」係近年社會新氣象，而PMQ元創方同活動策劃公司FEED就睇中呢點，將會喺嚟緊6月28日至7月2日，舉辦一個名為「世代同撈@Mart Box」嘅跨世代合作市集。

呢個市集會搵嚟多個傳統品牌同新晉牌子Crossover。就好似黛安細細個就聽過嘅「公利蔗汁」，將會夥拍本地手工啤酒品牌「麥氏釀酒廠」，推出限定製造嘅「公利蔗汁手工啤酒」；經典港產化粧品牌「雙妹嚜」，就會聯同新晉香水品牌「Artisenses」合辦香水工作坊。另外，現場仲會將迷你貨櫃布置成七、八十年代懷舊公屋背景，畀入場人士影返夠本，相信定會感受到一份濃厚嘅香港情懷！