黛安
黛安

曼聯名宿沙夏訪港 跟武術冠軍學功夫

發佈時間: 2017/06/22

曼聯名宿沙夏訪港 跟武術冠軍學功夫

曼聯加上「小鮮肉」會令人諗起乜?就係曼聯U16青年軍啦!香港賽馬會同曼聯同香港足球總會合作咗個全新項目「賽馬會青少年足球精英匯」,8月中就可以睇到曼聯U16青年軍同香港代表隊嘅精采賽事啦!

噚日曼聯名宿沙夏(Louis Saha)仲現身香港賽馬會嘅活動。據講佢對中國武術情有獨鍾,大會特登為佢請咗兩屆世界武術冠軍周定宇,喺短時間內傳授咗幾度散手畀佢。睇沙夏耍得有板有眼,睇嚟又幾有天份喎!

聽馬會公關講,沙夏今次訪港係為咗宣傳8月曼聯青訓來港交流一事。叫得交流,梗係唔少得打友誼賽啦!黛安知道,到時會有兩場公開嘅友誼賽喺青衣運動場開踢,首場係8月16號舉行,由曼聯U16青年軍成員對香港地區精英隊,而8月19嘅比賽,就會對香港U17代表隊,兩場比賽都會開放畀市民欣賞,相信會掀起連番激戰!

撰文: 黛安 消息特靈八卦公關
欄名: 八卦名利場