【聲明】港生活網站並無進行電話推廣活動

HKMA分享會 教網上直播秘技

發佈時間: 2017/06/23

你識直播,我識直播,今時今日有部手機,可以隨時想講就講。不過黛安去咗HKMA嘅「Seminar on Harnessing the Power of Live Streaming」分享會後,先知直播對品牌風險好高。好似海港城之前請小P老師邊行街、邊分享美粧心得,睇落好輕鬆,但事前做咗4、5次排練,直播時要安排十幾個工作人員在場舉貓紙同控制人流,好考執生能力。幫手搞小P老師直播嘅品智區域總監劉偉良都話「直播無take two」,品牌揀代言人時除咗睇人氣,都要思考下佢點樣幫手sell產品,「有時請紅星來,結果報道得明星花邊而無提品牌,都得物無所用。」

另外,之前透過fb直播曹星如21連勝拳賽嘅華為話,香港人無耐性,做直播最重要是貴精不貴多,雖然當時曹星如嘅賽時嚴重延遲3個鐘,「但我哋情願同網民道歉遲啲先有得睇,都唔會播住其他賽事先,唔係好易失焦。」現場其他專家亦分享,做直播最忌即興,以免喺欠缺周詳安排下,引發「關公危機」喎!

撰文: 黛安 消息特靈八卦公關
欄名: 八卦名利場