信和建築外牆 光影滙演慶回歸

維港海景係世界頂級，相信呢樣嘢毋須黛安再多講。近排黛安經過維港兩岸，間中都見到有工人喺幾座臨海建築密密做，原來係信和集團幫旗下項目嘅外牆安裝變色LED燈，組成巨型多媒體幕牆燈飾，準備以光影滙演慶祝香港回歸20周年。

公關姊妹話，今次大變身嘅建築包括尖沙咀中心、帝國中心、中港城、皇家太平洋酒店及信和廣場，咁多幢加埋用咗成12萬粒變色LED圓點燈，總面積超過8,700平方米，真係好大陣仗。呢啲巨型幕牆由前日起至到下個月21號，每晚6至11點，都會播放香港大都會景象同埋璀璨煙花，為維港海景錦上添花。

為慶祝回歸20周年，信和仲會搞「港魅•港情」攝影比賽，鼓勵大家透過鏡頭捕捉社區面貌同情懷，旗下商場仲會搞攝影工作坊同現場音樂節目𠻹，有興趣朋友記得留意喇。