黛安
黛安

「香港競XP」開幕 曼聯五小福齊玩《FIFA》

發佈時間: 2017/06/30

「香港競XP」開幕 曼聯五小福齊玩《FIFA》

細個嗰陣阿爸阿媽最鍾意叫我哋唔好打機,試問大家又點會估到,今時今日電競已經成為全球潮流呢?噚日黛安就去咗李嘉誠基金會、3香港同Razer合辦嘅「香港競XP」嘅開幕儀式,有幸見到曼聯92班「五小福」5位著名球星、網絡紅人達哥、足球評述員Keyman、同埋星台港三地嘅電競選手一齊玩足球遊戲《FIFA17》!

噚日嘅賽事真係超有火花,連唔多打機嘅黛安都睇得津津有味。最後由Keyman同達哥組成嘅Team Hong Kong勝出,為港爭光!主禮嘉賓和電香港執董兼CEO胡超文,同埋屈臣氏首席營運總監倪文玲都即場參與,仲話體會到電競係一個集腦力反應、思維協調、同埋執行力於一身嘅策略遊戲,打機嘅價值終於獲得世人認同喇!

香港競XP嚟緊兩個周末喺黃埔新天地時尚坊有電競擂台比賽,除咗《FIFA》之外仲有LOL、《部落衝突︰皇室戰爭》、《街頭霸王》,同埋電競角色cosplay大賽。去唔到現場嘅電競迷都唔使傷心,因為3香港嘅facebook專頁係會現場直播多場賽事㗎。

免費VR遊戲試玩

同場仲設有VR場景設置畀市民免費試玩,今次呢個VR同平時嘅好唔同,係全港首個走動式結合虛實場景嘅遊戲,玩家可邊行邊玩,甚至可拎起實物玩,簡直係「觸得到嘅VR」!去到7月16號都仲有得玩㗎,3特選客戶仲獨享「專享時段」𠻹!

撰文: 黛安 消息特靈八卦公關
欄名: 八卦名利場