楊明 袁偉豪 《打工捱世界II》捱出意志

無綫新男神楊明及袁偉豪，去年在節目《打工捱世界》中，到印度體驗基層工作；今年節目添食，二人到非洲坦桑尼亞及意大利威尼斯打工，更以「勇者」姿態徒手執新鮮牛屎，在艱苦工作中訓練堅強鬥志。

楊明及袁偉豪到發展較落後的坦桑尼亞，以及旅遊勝地威尼斯，可說是一個地獄、一個天堂。二人在坦桑尼亞做過健身教練、外賣仔和髮型師，但以馬賽村的工作體驗最深刻。楊明為幫助村民起屋，不惜勇闖「牛牛公廁」，徒手收集新鮮便便，以作混合泥土之用。可憐楊明用紙巾塞鼻對抗頑強氣味，依然極度想嘔，但為了拍攝只能死忍。

草原換胎好驚險

二人又在坦桑尼亞國家公園做導遊，袁偉豪說︰「我哋每日坐車喺大草原搵野生動物，獅子、豹、斑馬等等統統見勻，好似拍緊Discovery Channel咁。」途中更遇上驚險一幕，「大草原周圍都有野生動物，唔可以隨便落車。如果落車拍攝，會安排手持AK47嘅獵人保護我哋，免受襲擊。有日我哋係無安排落地拍攝，但架車突然爆胎，我哋惟有冒生命危險落車換胎，我哋換完胎上車，行咗無耐就見到有豹！」

貢多拉船夫最難

他們以為威尼斯之行會比非洲舒服，實情「諗多咗」。袁偉豪化身咕喱推車仔運貨，流下不少汗水；又學做貢多拉船夫撑艇，更是叫苦連天。他們說：「以為好似撑獨木舟咁，原來難好多！淨係支槳已經好重。加上每隻艇價值70至100萬港元，係船夫維生工具，河道又窄，好驚撞爛隻艇，壓力非常大。」

撰文︰李潔盈

編輯︰黃寶恩

設計︰Ｋ

無綫翡翠台下周一晚上10:30首播