經濟日報集團新福利 同事生日放假1天

近幾年，香港愈來愈多企業重視員工福利，希望可以慰勞到一班辛苦搏殺嘅員工。經濟日報集團近日就宣布，由7月1日起，全體員工可以享有「生日假期」！同事們知道呢個消息後都好開心，黛安聽到都覺得好羡慕啊！

7月起生效

依家好多企業都實行員工友善政策，特設生日假、健康假，甚至增加產假等。黛安八卦所得，經濟日報集團日前就發出通告，希望同事們喺生日嘅時候可以同屋企人一齊好好慶祝和輕鬆休息一下，仲話好支持work-life balance，所以宣布今個月起會新增一天有薪生日假期！黛安知道好多同事都對呢項德政拍晒手掌，仲有人話原本計劃請年假幫自己慶祝生日，估唔到依家會有「真‧生日假」，真係喜出望外！

呢個福利唔單止適用於所有全職員工，連因退休而轉聘嘅合約同事都涵蓋，意味住集團旗下所有刊物嘅員工，包括《經濟日報》、《晴報》、《U Magazine》、《e-zone》、《iMoney智富雜誌》、經濟通、U Lifestyle及CTgoodjobs等等十多個單位都受惠。另外，生日假唔一定要喺正日放，只要喺生日月份，預先向直屬上司及部門主管申請獲批就得㗎啦！

黛安樂見愈來愈多企業優惠員工友善政策，咁做唔止可增加同事歸屬感，亦可提升生產力及公司形象，締造雙贏。