港羽毛球少將大戰機械人

噚日係香港各界慶典委員會喺維園舉辦科技展嘅最後一日，黛安一早就去參觀，當中羽毛球機械人對戰香港青少年代表，最令人大開眼界。呢部羽毛球機械人唔單止可以準確定位，仲可以喺1秒內就作出相應揮拍動作，真係好厲害，難怪上年連國務院總理李克強都去同佢切磋。

呢部機械人係由上海荷福人工智能集團所研發，係全球首款「運動陪伴系列」智慧型機械人，有份研發嘅電子科技大學荷福研究院副院長駱德淵同黛安講，機械人唔單止定位精準，而且接球速度相當快，真係有真人水準。

幾位香港青少年羽毛球化表，包括李澤偉、陳廷澤、楊芯宜和周景苓都有落場同機械人切磋球技，以楊芯宜同陳廷澤組成雙人隊對戰機械人最有睇頭，一來一往，好有火花！最後港隊以21︰3大勝機械人，但黛安覺得如果對手係初學者，機械人未必輸呀！