秋生孖林海峰 新劇玩謝娛圈百態

黃秋生和林海峰（阿Jan）多年前曾合演電影《誤人子弟》，直到今年兩人終於在舞台上結緣，將於九月在香港演藝學院演出舞台劇《搞大電影》。劇中不乏諷刺電影圈的人和事，秋生強調不會開名，但一樣令觀眾過足癮。

黃秋生、林海峰、韋羅莎及導演甄詠蓓等，昨日在記者會上宣布加開三場，一共演出13場。大會更一反傳統，以頒獎禮形式介紹新劇，當頒發「秋生成就獎」時，阿Jan和秋生的浮誇演技引來哄堂大笑。

阿Jan表示去年在talk show已邀請秋生客串重演《誤人子弟》其中一幕，今次膽粗粗再找他，「我畀劇本佢（秋生）睇，揀到第二個劇本先啱，咁咪做囉。」

最長對白30頁紙

二人在劇中飾演電影人，見盡電影圈人生百態。問他們可擔心被指影射圈中人？阿Jan即笑指不是影射，而是「直射」，但就無意踩人。秋生謂︰「跟外國原著劇本，加咗香港術語，無開名㗎，係講人嘅處事方法。」

《搞大電影》是電影圈上位實況喜劇，對白連珠炮發，問二人會否即場爆肚？秋生解釋劇本有很多細節，搞到他都緊張起來。阿Jan則坦言︰「話唔緊張就難，只係自己個包袱無咁大。」他們又異口同聲表示最長的一段對白長達30頁紙，秋生戲言至今只講得出演出地點，連日期都未搞清楚。而阿Jan就補充因場地問題，目前只開13場，或考慮稍後開Part 2。

採訪︰Pauline

攝影︰林良明

編輯：陳禮恒

設計：梁政敏