《晴報》夏日沙灘巾 首日換走3000條

黛安昨日同大家介紹《晴報》6周年推出兩款P助、粉紅兔兔限定版沙灘毛巾換購活動。昨日一早黛安click開《晴報》嘅facebook，已經見到好多網民熱烈討論，展示戰利品相片之餘，順便交換各自嘅換購情報，講下邊啲分店換到斷晒貨，邊度仲有貨等等，積極發揮集體智慧！

灣仔金鐘最多人換

後來黛安致電《晴報》marketing嘅姊妹，佢哋都笑言反應比預期熱烈，仲向黛安透露，第一日已經換出接近3,000條毛巾，無論粉紅色定白色都咁受歡迎，各有捧場客；當然亦有唔少粉絲一次過換晒兩款返屋企，足證P助、粉紅兔兔有幾咁受歡迎！

唔知邊區換購反應最好呢？據講當中以港島區反應最熱烈，佢哋喺灣仔同金鐘呢兩個上班重鎮嘅指定7-Eleven，換出嘅毛巾數量最多；至於九龍區方面，就以葵芳同油麻地最受歡迎，證明好多上班一族都童心未泯。

黛安身邊都有唔少朋友喜歡精靈活潑嘅P助、粉紅兔兔，今次《晴報》推出嘅毛巾，採用棉質物料，觸感柔軟舒服，仲有110cm x 54cm咁大條，啱晒夏天戶外活動時用，加上實用美觀，難怪咁搶手啦！