港攝影師雲海照 奪國際賽大獎

香港成日畀人話係石屎森林，但其實仲有好多秘景等緊被人發掘。就好似香港攝影師李嘉蔚，因一次喺山上遇到難得一見嘅雲海，即刻用相機紀錄，呢幅相名為《這夜，照亮了一個夢》，仲奪得全球攝影比賽嘅「人類與大自然」組別大獎。

大自然保護協會喺4月舉辦咗一個「凝住自然」全球攝影比賽，邀請攝影師透過TNC網站或社交平台，提交以大自然為題嘅數碼攝影作品。結果吸引咗世界各地攝影師提交共32,704張作品，嘉蔚嘅作品係「人類與大自然」組別大獎12個優勝者之一。佢表示，人類身處大自然其實好渺小，「唔能夠要求大自然帶給我甚麼，只能順應自然，感受此時此刻」，佢希望用自己嘅相，畀外國人欣賞到香港自然景色，「只要用心發掘，香港都有世界級自然美景。」

大自然保護協會亞太區總幹事Charles Bedford話，嘉蔚嘅作品「完美展現咗兩者共繁榮嘅盼望」，呢個正係佢哋舉辦比賽嘅願景，希望引發大家探索大自然。