【聲明】港生活網站並無進行電話推廣活動

3米高Minion登陸青衣 反斗車王駛入又一城

發佈時間: 2017/07/06

暑期期間,陸續上映多部啱晒一家大細睇嘅動畫,如《壞蛋獎門人3》同《反斗車王3》,一班搞鬼嘅迷你兵團、可愛嘅車王繼續迷倒大小朋友。黛安發現多個商場都有佢哋身影𠻹!

其中青衣城由即日起到9月3日,不單有一班迷你兵團出現,仲有一個3米高嘅巨型迷你兵,勢必成為姊妹們打卡之地。

聽講即日喺青衣城消費滿指定金額,仲可以換到Bello Bello任務遊戲護照。買完嘢仲可以去場內5個遊戲區域玩,當中有2個係需要有護照先可以玩到。

無護照都唔使驚,可以去「迷你兵團拍照區」同「古古惑惑扮公室」玩,除咗免費入場,仲有電影中着囚衫造型嘅迷你兵團比粉絲任影﹗另外,儲齊13款壞蛋印章,仲可換到終極神秘寶物,但數量有限。除咗青衣城,Minions仲會喺綠楊坊、海趣坊、新屯門商場同恒福商場出現㗎!

DIY姓名貼紙

至於《反斗車王3》嘅一眾車王,已經喺九龍塘又一城捲起一股賽車熱潮。

即日至本月31號,電影裏面多個角色都會以1:1造型登場。現場仲有迪士尼.彼思期間限定店,有好多反斗車王精品,如玩具、LEGO、電玩、文具用品、飾品、家居用品同服裝等。掃完貨,大家仲可以去DIY專區,可親手自製姓名貼紙,上面仲有卡通人物,好可愛呀!另外,仲有銅幣製作機、貼紙相機同遊戲專區,相信小朋友一定會好鍾意。

撰文: 黛安 消息特靈八卦公關
欄名: 八卦名利場