超豪郵輪 盛世公主號首訪港 酒會星光熠熠

上豪華郵輪旅遊，係黛安覺得最舒服、最寫意嘅旅遊方式。如果有機會，真係好想坐住呢艘「盛世公主號」四處遊歷呢！

話說呢艘「盛世公主號」，係嘉年華集團公主郵輪旗下最新、最現代化同最豪華嘅郵輪，早排首度訪港，黛安有幸獲邀登船參觀。雖然艘船只係泊港一晚，但船公司幾乎請來全港所有旅遊業界猛人，包括旅遊事務專員、旅發局、各大旅行社及傳媒代表來臨，出席郵輪嘅酒會及紀念牌交換儀式，真有面子。

當日黛安唔止見到《晴報》社長麥華章，亦遇《晴報》專欄作家查小欣、方健儀及Esther Wong等，藝人曹眾、才子陶傑等均是席上客。大家喺香港嘉年華集團區域總監Nancy（鍾姚賽玉）等管理層帶領下四圍參觀。

空中走廊賞海景

講起船上設施就認真豪華，最令黛安深刻嘅，要數高懸於海平面39米、由船身向外伸延8.5米嘅SeaWalk，如果你唔畏高的話，可以走到呢條懸臂式空中走廊上欣賞海景，猶如置身藍天碧海之中；另外船上亦首創露天影院，大家可身處泳池邊，在夜幕及星空環抱下睇電影，浪漫又寫意！

參觀完之後，大家在主人家安排下到郵輪內三大主要餐廳之一Symphony享受fine-dining，以美酒佳餚為這晚畫上完美句號。