農圃新副綫 創意話題火鍋

繼「圃公館」後，名人飯店「農圃」最近又有新搞作，新店取名「圃鍋」，一看店名就知是打邊爐專門店。走年輕路綫，湯底、配料都有Gimmick，縱使天氣熱辣辣，都大條道理幫襯。

特色湯底12款，當中有帶宮廷色彩的濃湯魚翅花膠鵪鶉鍋及甜酸苦辣鍋，店方解說前者集合矜貴食材，味道濃香；甜酸苦辣鍋的設計靈感，則來自皇帝微服出巡時，體會到民間疾苦，百姓生活遭遇各種甜酸苦辣，好貼地。

甜酸苦辣鍋分成四格：橙色是甜，有海蝦、番茄及白蘿蔔；青色代表苦，因混合五青汁及苦瓜；辣的如血池地獄，集合辣椒乾、花椒、四川辣醬及辣椒油等而成的四川麻辣湯；酸香則來自酸菜豬骨湯，各有特色。其餘湯底有冬蔭功三文魚頭鍋、川芎白芷天麻魚頭鍋及特色瑜州毛血旺鍋等。

午市推中日Fusion定食

配料近百款，牛迷可選宮崎縣和牛、澳洲和牛及本地手切肥牛等，海鮮控不妨從店前的魚缸揀出心水，既有法國藍龍蝦、日本石鯛、阿拉斯加帝皇蟹等，亦可柯打刺身，像來自築地的海膽、吞拿魚、平目魚及帶子等。另推介自製手打丸及自製福袋。蘸食的農圃招牌XO醬也升級，今次以日本櫻花蝦代替蝦米炮製，味道香噴噴。

店子在午市會主打中日Fusion定食，共十多款選擇，像四式壽司配花膠時蔬，亦有迷你海鮮丼配石鍋茄子年糕。一個個精美套餐，附沙律及餐湯，最平$78起，加上環境舒適，試得過。

圃鍋

地址︰灣仔軒尼詩道314-324號W Square 4樓

電話︰2891 8689

營業時間︰11:30am-3pm、6pm-11:30pm

平均消費︰午市$100、晚市$450

編輯︰余運慶

設計︰招潤洪