首隻港產川金絲猴 命名「樂奇」

川金絲猴喺國際自然保護聯盟瀕危物種紅色名錄上，被列為瀕危物種，現時野外僅存約15,000隻，所以第一隻喺香港誕生嘅川金絲猴，真係好珍貴。

海洋公園之前就喺facebook為川金絲猴BB名字進行投票，結果「樂奇」擊敗「森森」、「洋洋」及「珍寶」或「Jumbo」等名字。昨日海洋公園正式宣布，將首隻喺香港誕生嘅川金絲猴BB命名為「樂奇」。據園方講，呢個名好有意思㗎，「樂奇」代表樂天好奇，亦包含BB父母─媽媽「樂樂」及爸爸「其其」嘅名字，因「奇」與「其」字同音。護理員為BB取英文名為「Lokie」，發音與中文名相近。

樂奇今年4月17日出生，現由母親樂樂餵哺；一如其名，佢愈大越見好動活躍，好奇心爆棚，亦比較調皮，鍾意喺樹叢及石頭間到處跳躍攀爬，探索家園，亦會鬼馬咁整蠱父母，可愛指數爆燈。黛安就祝「樂奇」喺香港開心生活，健康長大。