周柏豪過檔做星夢一哥 樂迷︰亞太男歌手後繼有人

上月與華納約滿的周柏豪，昨日正式加盟星夢娛樂取代許廷鏗的一哥地位。這位擁有不少年輕粉絲的新一代男神，同時簽約無綫新成立的TVB New Media，意味着正式轉戰公仔箱。有口痕友獻計TVB重設亞太男歌手獎，柏豪有望接棒做林峯2.0；有忠粉則對如日方中的柏豪簽約TVB喊出嚟！

昨午的記者會上，柏豪的經理人公司種星堂老闆鄒世龍、星夢老闆何哲圖、無綫高層杜之克及余詠珊等皆有出席，何哲圖更直呼柏豪是「星夢一哥」。柏豪形容新東家「人工高、福利好」，太太對其決定也非常支持，稍後亦會多拍劇集，並落實為有份參演的劇集《使徒行者2》唱主題曲。

問柏豪可想拿下最受歡迎男歌手，他坦言乜獎都想攞，如果有機會亦想成為視帝，他說︰「現在學嘢先，自己喺呢間公司都係新人。」至於原屬星夢一哥的許廷鏗加盟其舊東家華納，對此柏豪大方道︰「大家都找到了適合自己發展的公司和方向。」

新戲勁吸千萬票房

今次柏豪簽約星夢，令不少網友大跌眼鏡，全因該公司屬無綫旗下，柏豪誓將轉型狂唱師奶劇洗腦歌，令眾多少女粉絲失望。

事實上，32歲的他入行十年，除了曾在樂壇頒獎禮成為大贏家，亦兩度踏足紅館開個唱。此外，他主演的愛情片《原諒他77次》正在上映中，累積票房達1,200萬，可見柏豪無論在歌、影、視，皆有一定叫座力。

今次他除了取代許廷鏗及受桃色新聞困擾的鄭俊弘外，更令原本有機上位、同屬星夢歌手的胡鴻鈞好夢成空。然而，不少花生友大潑冷水，取笑柏豪將取代林峯橫掃勁歌頒獎禮；有粉絲則認為他有力在星夢獨大，相比加入其他唱片公司，總算除笨有精。

撰文︰Steven、Pat

協力︰Carol

編輯︰黃寶恩

設計︰梁政敏