【聲明】港生活網站並無進行電話推廣活動

會展晤體壇明星 試攀石 潮玩桌上足球

發佈時間: 2017/07/13

日日運動身體好,黛安平日都會揀行多幾級樓梯唔搭電梯,爭取時間做多啲運動。黛安下星期五(21日)就諗住去灣仔會展行下「香港運動消閒博覽」,買套新裝備power up自己,實行寓運動於行街。睇番大會簡介,原來今次博覽係首次舉行,有90間參展商、總共130個品牌嘅運動同消閒產品及服務有得揀。大會仲安排咗靚女跳高運動員楊文蔚、泳壇女神江忞懿等精英運動員到場分享下運動心得,連啱啱挑戰珠峰成功嘅物理治療師吳俊霆,以及首位完成太平洋屋脊步道嘅港人王維寶都會到場。博覽本月25日就完結,要去一定要mark實時間。

黛安聽公關姐妹講,有參展商仲整咗幅3.9米高嘅攀石牆畀入場人士試玩,仲有得玩桌上足球,真係「有得睇、有得郁」。足球概念店Futbol Trend亦搞咗個足球「名人堂」,展出古天奴、美斯等名將嘅簽名球衣,相信會吸引粉絲朝聖。

PopCorn睇健兒figure

搭車返屋企嗰陣,不妨去埋將軍澳PopCorn,商場今個星期六(15日)至9月3日會有期間限定「運動科學體驗館」開張,有得玩游水、羽毛球、跳高等體感遊戲,仲有得睇韓國Figure教父Coolrain以楊文蔚、女飛魚歐鎧淳、羽毛球王子伍家朗為原型創作嘅一比一figure,同埋逾50個以國際體壇巨星主題figure,唔好錯過。

撰文: 黛安 消息特靈八卦公關
欄名: 八卦名利場