《13點》與《老夫子》 機場驚喜亮相

文化藝術無分界限，香港國際機場即日起舉行為期4個月嘅「藝術、文化與音樂巡禮在機場2017」。呢場跨界別展覽，雲集世界各地超過50個表演單位，包括為人熟悉嘅《老夫子》漫畫角色，仲會喺機場無人駕駛列車月台同地面運輸中心長廊展出，無論香港人或者旅客都可以一齊回味呢套經典作品！

展覽邀請咗唔同單位合作參與漫畫展、電影展、共80小時嘅音樂演奏等環節，全部都喺香港國際機場舉行，費用全免。黛安就特別想欣賞紅極一時嘅漫畫《13點》及《老夫子》，聽講《13點》曾經出現過1,728套時裝，套套都係長衫，復古得來，又可以體現到服裝都會隨着時代變遷而轉變，非常值得一看！