袁澧林 馬志威 我們不是女神男神

ViuTV去年製作話題劇集《瑪嘉烈與大衛-綠豆》，主角林保怡和周家怡的愛情故事令不少人產生共鳴；今年ViuTV乘勝追擊，邀請「文青女神」袁澧林（Angela）夥拍「型格男神」馬志威（Edward）拍攝前傳《瑪嘉烈與大衛-前度》。兩人在劇內拋下男、女神包袱，但他們都說︰「其實我哋現實中都唔係『神』！」

Angela劇中飾演年輕版瑪嘉烈，與會計師男友許志安拍拖多年，但中途卻接受了Edward飾演的情場高手、電台DJ大輝的追求，陷入三角戀，兩人更有多場激烈親熱戲。Edward分享當中趣事︰「有場戲講我同Angela係車廂內kiss，但佢拍之前好緊張，係咁傻笑、跑來跑去。」Angela立即解釋︰「因為佢係我熒幕初吻，之前試過錫面，未試過嘴對嘴，同埋咀咁耐、咁肉緊。」

拒一腳踏兩船

Angela形象健康正面，但她坦言與追求刺激感的瑪嘉烈有不少相似之處︰「瑪嘉烈好貪玩，覺得自己有時間同本錢，點解唔拍多幾次拖？而我都覺得自己仲後生，咩都想試下。」但強調這態度僅限於工作；愛情觀上，她斬釘截鐵地說︰「我當然唔會一腳踏兩船啦！」

至於外表瀟灑的Edward，看似跟角色大輝一樣是「花心男」，但他自爆戀愛經驗不多︰「每段關係都有五年、七年。拍拖溝通最緊要，我唔需要驚天地泣鬼神嗰種，簡簡單單係屋企煮飯仔已經ok。」事實上，他早已有拍拖多年的同居女友，兩口子早前更被拍到行街拍拖，sweet到爆！

愛回家的毒男

Edward更自認是一名「毒男」︰「我平時最鍾意係屋企睇電影、睇波同打機。」Angela對Edward的評價也非常正面︰「佢嘅專一令我好surprise，從一些細節睇得出佢好規律，成日打電話話『我放工喇』、『我返屋企喇』。」

Edward不認為自己是「男神」，而對於Angela的「文青女神」稱號，他亦笑說︰「唔識佢會覺得有啲冷艷，有種獨特、型格嘅氣質，但熟絡咗就覺得佢係一個好天真爛漫的妹妹仔。」Angela也覺得只憑外表和衣着來標籤人是不太恰當，所以她不忘大呼︰「唔好叫我文青女神！」

Angela服裝：PORTS 1961/ PUMA

場地：Cafe Hillywood

撰文︰陳子楠

攝影︰林良明

編輯︰黃寶恩

設計︰梁政敏