渣打慈善家庭跑 下星期日奔向添馬

渣打香港一向重視企業社會責任，每年參加200幾項唔同社區活動回饋社會，又為員工提供每年額外3日有薪義工假期，鼓勵佢哋積極服務社會。黛安之前聽渣打香港CEO禤惠儀講，為讓更多市民為社會出力，今個月23號將會舉行「渣打慈善家庭跑」。喺過去嘅周末佢就同多名管理層及200名義工，喺觀塘渣打中心派發跑手包畀差唔多成千名參加者，希望身體力行宣揚互助團結精神。

黛安仲知道，活動當日會有400位渣打員工喺跑道沿途做義工，由朝早8點至晏晝1點，仲會喺終點區添馬公園搞合家歡嘉年華，提供20幾個精采活動，實行藉活動聯繫每個家庭，費用全免㗎！渣打仲會唔扣成本，將當日籌得款項全數捐畀「看得見的希望」、香港殘疾人奧委會暨傷殘人士體育協會同香港防癌會，並會為善款進行配對。咁有意義嘅活動，又點少得大家支持呀！