旅遊體會人生 項明生書展出兩新書

香港人生活咁忙碌，難得有時間去旅行，都希望可以係一個心靈之旅，叉足電再搏殺！今年書展嘅主題正正係旅遊，旅遊達人項明生（James）亦都有兩本新書面世，包括《天地一旅》及《提前退休3︰坐郵輪遊冰島、大西洋、太平洋》，聽個書名都知係非一般之旅。

James話大家平時旅行可能係吃喝玩樂，來匆匆，去也匆匆，但其實世界上有超過800個文化遺產，好似埃及金字塔、耶路撒冷古城等，大部分都同宗教有關。佢仲透露，用咗5年時間遊歷和籌備新書《天地一旅》，到訪過印度、尼泊爾、緬甸、印尼、寮國、不丹、敦煌、西藏、韓國、日本、越南，仲話「呢本唔止係旅遊筆記，亦都係文學、藝術和佛學嘅結合體」，希望大家讀完呢本書，會好似走完人生一遍，體會到世界之大，自己只係微塵細沙咁話。聽完呢句，已經好有欲望買番本來洗滌心靈！