感情生活空白多年 陳法蓉拒收觀音兵

已八年沒有拍拖的陳法蓉（Monica），最近有報道指她感情生活dry爆之餘，又指她曾介入錢小豪和丘倩鳴的婚姻，不過伊人昨日強調無拖拍不等於無人要；同樣感情未有着落的阿佘亦認為最緊要開心。

對於被指介入錢小豪婚姻，Monica不怒反笑謂︰「我呢八年不嬲都好滋潤，雖然無拍拖但我一啲都唔dry，朋友話好羨慕我可以自由自在去食魚生。」她又沒好氣說︰「我同錢小豪，仲有佢太太都係好朋友，知道咩事嘅人就覺得搞笑囉！」問到Monica目前可有拍拖？她肯定表示︰「無，不過我唔鍾意收觀音兵，係就係，唔啱就會打沉佢，免得令人有錯覺。呢八年嚟有無拖拍唔重要，搵到真命天子先係威，我唔想畀人以為我無人要，事實好多人想要，係我唔畀啫。」

談到她與阿叻（陳百祥）在《賭城群英會》中連場激吻戲，Monica笑謂之後還有，不過都是碎料。但網民似乎不太接受她和阿叻這一對，她說︰「任何年紀嘅人都需要愛，如果噚日拍拖嘅話今日都會錫，有乜咁奇怪！」

阿佘重申有滋潤

另外，同場的阿佘被問到可有收觀音兵？她笑笑口謂︰「我依家好開心，（有新戀情？）有人追都唔得啦，我咁忙，成日飛嚟飛去。（即係有人追？）無喎！搵錢唔開心咩？（你Dry咗幾多年？）我梗係話無，死都要咁講，我一直都滋潤住（阿媽啲湯水？）你哋唔好理，總之就滋潤啦！」

此外，阿佘又透露現正拍電影《洩密者》，預計下月中完成香港戲份，不過在暑假期間就無計劃出外度假，事關緊接住會到橫店拍一齣內地古裝劇。雖然夏日炎炎到內地拍劇很辛苦，但她表示劇本和角色吸引，令她無法抗拒。

採訪︰Pauline

攝影︰林良明

編輯：林梓添

設計：梁政敏