黛安
黛安

馬季煞科荷包進帳 青姐 李純恩 小注怡情

發佈時間: 2017/07/18

馬季煞科荷包進帳 青姐 李純恩 小注怡情

暑期金多寶今晚攪珠啦,唔知大家有無買番張彩票碰下運氣呢?今期頭獎有成$8,000萬咁多,所以呢幾日身邊朋友都議論紛紛,希望可以發一筆橫財!咁啱早兩日黛安參加馬會飯局時,荷包亦有小進帳,當然希望呢股財運能延續下去啦!

話說前日係馬季煞科,馬會邀請咗一班傳媒友好去沙田馬場廂房聚餐。當日黛安喺會上遇見唔少朋友,譬如《晴報》專欄作家青姐(胡孟青)、食家李純恩,仲有資深傳媒人香Sir(香樹輝)及Luke Sir(曾智華),非常熱鬧。雖然黛安和青姐、李純恩對跑馬無甚研究,但十分認真睇賠率、看沙圈,仲場場買,學人分析。正當我哋幾個「柴娃娃」討論要買邊隻,向來熱衷賽馬的香Sir和Luke Sir,當然無我哋咁好氣啦,繼續專心鑽研。

亂點點中三重彩

說來好運,黛安當日湊熱鬧每場揀4隻馬,買「連贏」和「位置Q」,無諗過8場居然中咗6場,能夠贏錢離場純粹好彩。不過點都唔夠李純恩和馬會公關Margaret犀利,當日李純恩話無心水,Margaret好似好專業咁,睇馬匹的顏色、又問其他人,最後都係亂咁點畀咗幾個「冧把」佢,結果竟然中咗一條三重彩,羨煞旁人。而青姐則笑言自己全日贏咗少少,但滿足感卻比股壇賺幾萬元更開心。

除咗我哋幾個有錢贏,黛安知道馬會今個馬季的投注額亦相當可觀,總投注額達1,174億元,當中三分之二增長來自本地投注,其餘則來自滙合彩池,反映馬會過去一年拓展多個海外市場的成功。馬會將繳納131億元的博彩稅,希望支持更多慈善服務,為社會出一分力。

撰文: 黛安 消息特靈八卦公關
欄名: 八卦名利場