詠藜園義賣月餅 為3機構籌款

仲有兩個多月就係中秋節，相信大家都開始諗去邊度買月餅？有無諗過原來買月餅都可以幫到人？黛安知道今年詠藜園將繼續舉辦慈善月餅義賣。呢個活動由2012年開始，5年嚟幫助咗好多唔同嘅慈善團體，累積善款仲超過$300萬，而今年所得到嘅收益，扣除材料費後，80％會全數撥款畀3間受惠機構，幫助社會上有需要嘅人。

4款口款選擇

認識詠藜園老闆楊王小玲多年，知道佢向來樂於助人，因此黛安每年都會光顧詠藜園嘅月餅，身體力行支持楊太嘅善行。況且，詠藜園月餅無論水準同健康指數一樣咁高，今年佢哋繼續會推出4種口味月餅，包括健康海藻糖白蓮蓉榛子、紅棗核桃、黑芝麻核桃及八仁月餅，屋企人實鍾意。

昨日楊太自己保持低調，反而積極向黛安等來賓介紹幾間受惠機構嘅負責人，希望在場人士多啲認識佢哋，了解機構嘅工作和需要，實在有心。香港失明人互聯會及榕光社，過去一直獲得詠藜園嘅捐助，並用有關善款幫助唔少視障人士及獨居長者，令佢哋喺生活、社交及經濟上得到支援。

至於今年新增嘅受惠基構房角石協會，其董事會主席湯頌年牧師話，組織近年主要幫助一班腦癱嘅兒童及其家長，今次獲得嘅善款就會作支援用途，例如治療師只收取象徵性收費，幫病童利用電腦學習。如果大家都希望過個有意義嘅中秋，不妨把握佳節幫襯詠藜園，出一分力啦！